Ik was n kiend

Dinsdag het Gert Sennema zien 2 CD's ten deup hollen ien de Burcht van Griepskerk.
Noa een körte roadsvergoedering dee Gert eerst twee akoestiche nummers en noa de pauze trad hij op met e muzikanten die hem ok holpen hemmen bij t moaken van e CD.
Der wadden wat problemen met t geluud, moar me dunkt dat er 100 bezoekers wadden en dat die allemoal knap onder e iendruk wadden.

Eemen over beide ploatjes.

Op 'Tuus' stoan 6 nummers die we as dorpskroniek veur Griepskerk reeknen kennen. Het gijt over bekende Griepskerk en algemene zoaken Gaswinning en Koale Kak.
Bij veul Griepskerkers deden dizze verskes het goed.

Op 'Woar' stoan annere nummers. Hiel verschillend van kleur en geluud. Sums met n hiele rockband, sums alleen gitaar of met n viooltje derbij. Veul verskes kon ik al ien e akoestische versie, moar dit is n opemboaring. Iengetogen "Ik was n kiend", uutloaten in 'Kruusweg' en ontroerend ien 'Zunder dij'.
Zunder andere muzikanten te kört te doen, veur mij de mooiste Westerketierder CD ooit.

Veur mij was t dinsdag ien Griepskerk "Ik was n kiend en ik leufde dij!". Gert, kist mooi ien e buus steken.

Lunchgast bij RTV-Noord

Ons persberichtje omtrent t oprichten van e stichting Mien Westerkwartier kreeg drekst reactie. Dinsdagmiddag zat Geert as Lunchgast bij RTV-Noord ien t programma Noord Nieuws Middageditie. Net te loat belde interviewer René Walhout op of er zien gitaar metnemmen kon, moar Geert was al ien Grunnen.

t Was n mooi lös gesprekje over het doel van e Stichting. En n vliegende kraai vangt altied wat. Geert liep Jaques d'Ancona weer tegen t lief en het ok nog eemen proat met Reinder Smit, die op tillevisie het programma 'Plattelanders' moakt. 'As der wat moois is ien t Westerkwartier', wel eemen bellen': zee Reinder. Doar hol we m aan.

Stichting Mien Westerkwartier opricht

Op 16 meert is ien t kantoor van netoares De Boer ien Moarum de oprichtingsacte van e 'Stichting Mien Westerkwartier' passeerd. De Stichting Mien Westerkwartier wil aandacht geven aan e toal, cultuur en historie van et Westerkertier.

Ien febrewoarie wer ien Lutjegast de aanzet geven tot e oprichting van dizze stichting. Ien die moand kwammen een vieftiental mensen bijmekoar die, op uuteenlopende wieze, actief bezeg bennen met et Westerkertier(s). Schrievers, dichters, muzikanten, beeldend kunstenoars en amateur-historici gaven aan dat der behuufte is om mekoar met n bepoalde regelmoat tegen te kommen, ideeën uut te wisselen en mekaander te ienspireren tot nije initiatieven en soamenwarken.
Doarnoast is der verlet van n menier om de 'producten van et Westerkertier' onder de aandacht, en beter aan e man te kriegen. Deur middel van n web-site, een nijsbrief en et organiseren van activiteiten wil de stichting mensen ienspireren om zulf actief met te doen aan et moaken van de nije producten (gedichten, verhoalen, verskes, foto, film e.d.) en om doar ok kennis van te nimmen.

Ien et veurlopeg bestuur hemmen plaknommen:
Geert Zijlstra, streektoalmuzikaant en initiatiefnimmer;
Tonko Ufkes, schriever en dichter;
Omke Oudeman, fotogroaf;
Melle Hijlkema, schriever en dichter.